ஒன்றுபடு ( கவிதை)

சரித்திர புருஷர்கள் ஆண்ட
சாதனை தமிழ் தேசத்தை –
மங்குனி மந்திரிகள் ஆள்வதால்- எம்
மானம் கெட்டுப் போச்சு
ஈன பிழப்பு ஆச்சு.‌.

ஸ்டெர்லைட் ,
அணு உலை ,
ஹைட்ரோ கார்பன் எனும்
அழிவு திட்டங்களுக்கு
அனுமதி அளித்து
பெருமை அடிக்கும்
பெரும் களவாணி கூட்டத்தில் – எம்
பெரு நாடு சிக்கித் தவிக்கிறது..

மதுவுக்கு எதிராக
செயல் புரிந்த
பெரியார் வழி பிள்ளைகள் –
மது ஆலைகள் நடத்துவதும்
மதுவை அரசே விற்பதும்
விந்தையின் உச்சம்..!
மந்தையின் கூச்சம்…!

சமூக நீதி
சமத்துவ போதி மறந்து
குடும்ப அரசியல்
கும்மாளம் போடுவது –
அமுத திராவிடம்
திரிந்த பாலாய் போனது..

ஊழல் பெருநதியில்
ஊறித்திளைக்கும்
நாதாரி மந்திரிகளால்
வேடதாரி தந்திரர்களால்
தமிழ் மக்களுக்கு கடன் வந்தது
ஐந்து இலட்சம் கோடி..!
தமிழக மந்திரிகளுக்கு கிடைத்தது
ஐந்து நட்சத்திர மாடி…!

கல்லணை கட்டியவனின்
மரபணு மந்திரிகள் – தேவைக்கு
அணைகள் கட்ட – அரசு
ஆணைகள் இடாததால்
விளைநிலங்கள் அழிந்து
வீடு மனைகள் ஆனது ‌‌..!
விவசாய விளைச்சல் குறைந்து
விவசாயிகளின் சாவு நீளுது..!

கலவி மயக்க கண்ணுக்கு
கழுதையும் பேரழகாய்
தெரிவது போல் –
வயற்காடுகள் அழித்து – எட்டு வழி
தார் ரோடுகள் போடுவது
பெருமையாக தெரிகிறதோ..!?

கல்வியையும் ,
மருத்துவத்தையும்
மக்களுக்கு அளிப்பது
நல் கோல் அரசின் கோட்பாடு..!

மதுவை விற்பதும்
மக்களை அழிப்பது
கொடுங்கோல் அரசின் தீ காடு…!

எண்ணைக் கழிவு
எண்ணூரில் மிதந்த போதும் ,
அணுக்கழிவை பாதுகாக்க
அழகிய குமரியை ஒதுக்கிய போதும்
கும்பிடு சாமி மந்திரிகளும்
குடும்ப அரசியல் தந்திரிகளும் –
தான் சேர்த்த
ஊழல் பணத்திற்கு
ஊறு வந்து விடும் என
ஊமையாக இருப்பதை என்ன சொல்ல ?

உவர்பற்ற உல்லாச மந்திரிகள்
உயர்நிலை அடைய
உயிர் நீர் நிலைகளை
வெளிநாட்டு நிறுவனங்களுக்கு
விற்றதால் – வாங்கியவன்
நீர்நிலைகளையும் அழித்து
நிலத்தடி நீரையும் அழித்ததால் –
இயற்கை எழில் சோலை
இதயம் செத்து ஆனது பாலை…!

பிரித்தாளும் மத்திய அரசுக்கும்  – நம்மை
வெறுத்தாளும் மதியில்லா அரசுக்கும்
தூபம் காட்டும்
சாபக்கேடு அரசால்
சீர்கேடு ஆனது தமிழனின் வீரம்..!

தமிழனே..!
தனிப்பெரும் மறவனே…!
நம் நிலம்
வேட்டையாடப்படுவதை
வேடிக்கை பார்த்துக்கொண்டு இராதே..!

ஒன்றுபடு..!
வென்று முடி..!!

                                                             கவிஞர். விஜய் சேசுலா